Yn ddiweddar mae Coleg Ceredigion wedi rhoi Bienvenue cynnes i ddeuddeg myfyriwr Peirianneg o’r coleg Lycée Professionnel Julien de Balleure, Chalon-sur-Saône ym Mwrgwyn. Daeth y myfyrwyr, dan ofal dau aelod o staff, i ymweld â Champws Aberteifi Coleg Ceredigion er mwyn cael blas ar Gymru ac i ddatblygu eu sgiliau ieithyddol.

Trefnwyd yr ymweliad gan John Jones, Darlithydd Peirianneg yng Ngholeg Ceredigion a Mdme Nadine Perceau, darlithydd o’r coleg yn Ffrainc. Roedd gan y myfyrwyr amserlen brysur a hwylus yn ystod yr ymweliad a ddechreuodd â phryd o fwyd “Blas ar Gymru” ym Mwyty Park Place Coleg Ceredigion a gafodd ei baratoi a’i weini gan fyfyrwyr Arlwyo’r coleg. Hefyd yn bresennol ar gyfer y cinio oedd Pennaeth y coleg, Jacqui Weatherburn; Allison Coleman, Cadeirydd Bwrdd y Llywodraethwyr; a’r Cynghorydd Catrin Miles, Maeres Aberteifi. Ymysg ein cyfeillion o Ffrainc yr oedd Dirprwy Bennaeth Julien de Balleure, M. Mathieu Liegault a Phennaeth Hyfforddiant Galwedigaethol M. Rachel Maricq.

Roedd y digwyddiadau yn ystod yr ymweliad yn cynnwys trip i lechweddau sgïo a sledio Gwersyll yr Urdd, Llangrannog, Amgueddfa Genedlaethol y Glannau yn Abertawe ac Amgueddfa Bŵer Unigryw Internal Fire yn Nhan-y-groes. Rhoddwyd teithiau tywys o amgylch amryw o adrannau gwahanol Campws Aberteifi i’r ymwelwyr, ac fe gawsant y cyfle i dreulio amser yng ngweithdy Cerbydau Modur y Coleg yn gweithio gyda’u cyfoedion o Gymru.

Yn dilyn yr ymweliad diolchodd John Jones i’w gydweithwyr yng Ngholeg Ceredigion a gynorthwyodd â’r ymweliad, yn benodol i’r rheini a gynhigiodd lety i’r Ffrancwyr yn ystod yr ymweliad. Roedd hefyd yn dymuno diolch i’r siopau amrywiol a’r bobl yn Aberteifi a estynnodd groeso a chymorth i’r myfyrwyr o Ffrainc. Dyma’r ail dro y mae myfyrwyr o Julien de Balleure wedi ymweld ag Aberteifi, ac fe deithiodd myfyrwyr o Goleg Ceredigion i Chalon-sur-Saône ym mis Ebrill 2011. Roedd yn sicr bod cyfeillgarwch cryf wedi datblygu rhwng y ddwy ochr, ac mae’n gobeithio y bydd y cyswllt yn parhau am flynyddoedd i ddod.

Wyt ti’n chwilio am rhywbeth gwahanol i’w wneud? Wyt ti eisiau dysgu sgiliau newydd ond heb syniad ble i ddechrau? Beth am gofrestru ar un o’n Gweithdai Dydd Sadwrn sy’n cael eu cynnal Dydd Sadwrn 12fed Mai ar Gampws Aberystwyth a 19eg Mai ar Gampws Aberteifi.

Bydd y gweithdai RHAD AC AM DDIM yma’n rhoi’r cyfle i chi roi cynnig ar rywbeth newydd mewn awyrgylch hwylus a diffwdan.

Cliciwch isod i weld beth sydd ar gael:

Aberystwyth

• Pobi a Chreu Cacenni Bychain
• Crefft Siwgr
• Printio
• Ffotograffiaeth Ddigidol
• Gweithdai Clyweliad

Aberteifi

• Adeiladu Barbeciw
• Bara Blasus
• Menywod wrth y Llyw
• DIY i Fenywod

Nifer cyfyngedig o leoedd ar gael. Archebwch eich lle trwy ffonio’r rhifau isod:

Aberystwyth: 01970 639730

Aberteifi: 01239 622310

Yn ddibynnol ar delerau ac amodau

Llwyddodd entrepreneuriaid sydd ond megis dechrau o gampws Aberystwyth Coleg Ceredigion, i blesio’r panel yng Nghynhadledd Broliannau Mentrus a gynhaliwyd ym Mhrifysgol Cymru, Y Drindod Dewi Sant.

Mae’r Gynhadledd Broliannau Mentrus yn nodi terfyn prosiect blwyddyn o hyd rhwng Prifysgol Cymru, Y Drindod Dewi Sant, Coleg Sir Gâr a Choleg Ceredigion, ble roedd myfyrwyr yn cymryd rhan mewn cyfres o weithdai mentrus oedd â’r bwriad o ddatblygu eu sgiliau a’u syniadau mentrus. Bu’r gweithdai’n gymorth i’r myfyrwyr wrth feddwl am y llwybrau sydd ar gael iddynt ar ôl gorffen eu hastudiaethau, fel hunangyflogaeth a dechrau eu busnes eu hunan.

Gwahoddwyd Megan Webster a Harriet Farley, myfyrwyr Busnes Lefel 3, i wneud broliant o’u syniadau unigol eu hunain i’r panel oedd â Percy Emmett, Ymgynghorwr Sefydlu Busnes, yn bennaeth arno. Roedd syniad Megan o sefydlu agorfa werthu ar-lein sy’n cyflenwi crefftau o Dde Affrica gyda chyffyrddiadau Masnach Deg wedi cael digon o argraff ar y beirniaid iddi ennill gwobr ar ddiwedd y broliant. Oherwydd bod Megan wedi ymchwilio’r syniad ac wedi gweld bwlch yn y farchnad, roedd hyder Megan yn y cysyniad yn glir wrth iddi wneud ei broliant.

Daeth tro Harriet i wneud broliant o’i syniad, a chafodd gymaint o argraff ar y beirniaid maent wedi cynnig cyngor ar roi breinlen ar y syniad ar gyfer y dyfodol.

Dywedodd Keith Henson, Rheolwr Datblygu Busnes yng Ngholeg Ceredigion “Mae Megan a Harriet wedi dangos blaengaredd yn eu broliannau, ac maent wedi cynrychioli Coleg Ceredigion yn dda iawn. Llongyfarchiadau i’r ddwy ohonynt”.

Mae prentis yn Coleg Ceredigion wedi derbyn Gwobr Urdd Lifrau Cymru er mwyn cydnabod llwyddiant eithriadol.

Derbyniodd Gareth Jones, Prentis gwaith brics yn ei ail flwyddyn, y wobr yn noson wobrwyo flynyddol Coleg Ceredigion yn ddiweddar a gyflwynwyd gan Richard Gwynne, ConstructionSkills. Derbyniodd Gareth y wobr i gydnabod ei ymdrech aruthrol wrth gwblhau ei fframwaith, ac am ei ymrwymiad i lwyddo yn y coleg ac yn ystod ei gyflogaeth gyda Paul Draper o Pentregat.

Dywedodd Swyddog Maes ConstructionSkills, Richard Gwynne “Rydym yn falch iawn fod Gareth wedi llwyddo i gwblhau ei gymhwyster cyfan, ac rydym yn falch o allu ei gefnogi trwy ei brentisiaeth”.

Dywedodd Huw Thomas, Arweinydd Cwricwlwm Coleg Ceredigion “Hoffwn longyfarch Gareth ar ennill Gwobr Urdd Lifrau Cymru. Mae Gareth a’i gyd-fyfyrwyr ar y cwrs wedi dangos lefel uchel o ymrwymiad, a hoffwn ddiolch i’r darlithwyr ac i ConstructionSkills am eu cefnogaeth wrth helpu’r myfyrwyr i gyrraedd eu potensial”.

Roedd hi’n achos dathlu yn Neuadd y Dref, Aberteifi, yn ddiweddar wrth i fyfyrwyr, staff, teulu a ffrindiau, ynghyd ag aelodau o Fwrdd Llywodraethu’r coleg, cyflogwyr lleol, Cynghorydd Catrin Miles, Maer Aberteifi, a Chynghorwyr Tref ymuno i ddathlu llwyddiant myfyrwyr Coleg Ceredigion yn y Seremoni Wobrwyo flynyddol.

Eleni, cyflwynwyd 29 o wobrau gan Allison Coleman, Cadeirydd Bwrdd Llywodraethu’r coleg. Yn ystod y Seremoni, amlygodd Allison bod y gwobrau’n cael eu cyflwyno am nifer o resymau gan gynnwys cyrhaeddiad academaidd uchel, ac ymdrech arbennig ar lefel bersonol, wrth iddi longyfarch pob un ar eu llwyddiant a’u gwaith caled.

Wrth gloi’r seremoni, pwysleisioddJacqui Weatherburn, Prifathrawes Coleg Ceredigion, y dylai’r seremoni wobrwyo gael ei ystyried yn fan cychwyn ar daith o ddysgu gydol oes. Rhoddodd hefyd air o ddiolch i’r athrawon, teulu a ffrindiau am eu cefnogaeth i sicrhau llwyddiant i’r myfyrwyr.

MeddaiJacqui Weatherburn, “Mae’r Seremoni Wobrwyo yn gyfle gwych i’r coleg ac i’r gymuned ddathlu llwyddiant ein myfyrwyr. Mae’r enillwyr heno yn haeddu llongyfarchiadau gwresog, ac rydym yn dymuno pob llwyddiant iddynt yn y dyfodol”.

Ar ddiwedd y seremoni, cafwyd bwffe rhagorol ym Mywty Maes y Parc wedi ei baratoi a’i weini gan fyfyrwyr a staff yr adran Arlwyo.

Myfyrwyr llwyddiannus Seremoni Wobrwyo Coleg Ceredigion gyda Rhiannon Elias, Cyfarwyddwr Cynorthwyol y Cwricwlwm, Huw Thomas, Arweinydd Cwricwlwm, Cynghorydd Catrin Miles, Maer Aberteifi, Allison Coleman, Cadeirydd Bwrdd y Llywodraethwyr, Jacqui Weatherburn, Prifathrawes Coleg Ceredigion, a Robert Thompson, Cyfarwyddwr y Cwricwlwm.

Mae Coleg Ceredigion yn cefnogi ymgyrch Ailgylchu Apêl Arch Noa trwy osod bin ailgylchu tecstilau ar y campws yn Aberystwyth.  

Mae staff a myfyrwyr yn cael eu hannog i ddod a bagiau o ddillad, esgidiau a chyfwisgoedd i’r coleg i’w hailgylchu. Yn ddiweddar, daeth Les Jones, Llysgennad Apêl Arch Noa ar ymweliad i gampws Aberystwyth er mwyn cwrdd â staff a myfyrwyr a chynnal agoriad swyddogol ar gyfer y bin ailgylchu tecstilau ar ran yr elusen.  

Mae rhoddi dillad diangen yn ffordd gwych o gefnogi Apêl Arch Noa gan nad yw’n golygu unrhyw gost i’r rhoddwr ac mae’n arbed yr amgylchedd.

Dywedodd Suzanne Mainwaring, Cyfarwyddwr Apêl Arch Noa, “Mae Apêl Arch Noa yn codi oddeutu £100,000 bob blwyddyn trwy bartneriaethau gyda nifer o gwmnïau ailgylchu. Mae’n hanfodol ein bod yn parhau i dderbyn rhoddion dillad fel y gallwn eu troi i mewn i arian i helpu cleifion ifanc yn Ysbyty Plant Cymru.”

Yn ogystal, mae Coleg Ceredigion wedi bod yn codi arian ar gyfer Apêl Arch Noa ac eisoes wedi casglu £260 ar gyfer ymgyrch Splish Splash Splosh, a’r Apêl Hosan Nadolig.

Os oes gyda chi unrhyw ddillad nad ydych eu hangen, gallwch ddod â hwy i gampws Aberystwyth i’w rhoi yn y bin ailgylchu arbennig ar gyfer Apêl Arch Noa.

Myfyrwyr Gofal Plant ar Gampws Aberystwyth gyda Llysgennad Apêl Arch Noa, Les Jones ac Elen Lionel, Darlithydd Gofal ac Addysg Plant.

Mae myfyrwyr Gofal Plant ar Gampws Aberteifi yn cynnal nifer o weithgareddau yn ystod yr wythnos hon i godi arian tuag at Tŷ Hafan a Latch.

Bydd Charlotte May, Eliza Bentley, Edward Mumford, Abi Giles, Amanda Moss and Heledd Powell yn cynnal casgliad stryd yn nhref Aberteifi gyda jeli yn eu ‘welis’, yn ogystal â gwerthu tocynnau raffl a chynnal tombola yn y coleg. Byddant hefyd yn cynnal gêm ‘o gadair i gadair’ gyda’r gobaith o godi cymaint o arian â phosib i’r elusennau.

Hoffai’r myfyrwyr ddiolch i fusnesau Aberteifi am eu cefnogaeth trwy gynnig gwobrau ar gyfer y raffl.

Os hoffech chi wneud cyfraniad tuag at yr elusennau, neu brynu tocyn raffl, galwch yn y Dderbynfa ar Gampws Aberteifi i ymuno â’r hwyl!

Gwobrwywyd un o fyfyrwyr cwrs Arlwyo a Lletygarwch Coleg Ceredigion gyda thystysgrif Safon Arian yn rownd Canolbarth Cymru cystadleuaeth Gweini “WorldSkills” yn ddiweddar.

Bu Beth Clark, myfyrwraig ar gwrs Lefel 2 mewn Gwasanaeth Bwyd a Diod yng Ngholeg Ceredigion, yn cystadlu yng nghategori Gweini Bwyd Uwch y gystadleuaeth ranbarthol a gynhaliwyd yng Ngholeg Powys ddechrau’r mis. Yn ystod y gystadleuaeth bu Beth yn gweini pedwar o westeion gan arddangos sgiliau yn amrywio o ddewis a gweini gwin yn gweddu i’r bwyd i ddefnyddio techneg gweini fflamboeth wrth y bwrdd. Ar ddiwedd y gystadleuaeth dyfarnwyd y wobr gyntaf i Beth a derbyniodd Dystysgrif Safon Arian i gydnabod ei llwyddiant. Mae Beth bellach wedi sicrhau ei lle yn cynrychioli rhanbarth Canolbarth Cymru yn y rownd derfynol a gynhelir yng Ngholeg Llandrillo ar y 27ain o Fawrth.

Meddai Bill Mousley, Darlithydd mewn Sgiliau Gweini Bwyd yng Ngholeg Ceredigion “Mae Beth wedi gweithio’n galed i baratoi ar gyfer y gystadleuaeth, ac wedi cynrychioli’r coleg yn arbennig o dda. Hon yw’r bedwaredd flwyddyn i un o fyfyrwyr Coleg Ceredigion lwyddo yn y gystadleuaeth hon, ac rydym yn falch iawn fod Beth wedi gallu cystadlu ar lefel mor uchel yn erbyn myfyrwyr talentog eraill yn y rhanbarth. Pob lwc iddi yn y rownd derfynol!”.

Mae un o ddarlithwyr Coleg Ceredigion wedi derbyn gwahoddiad i feirniadu yn rownd derfynol cystadleuaeth Gweinyddiaeth Bwyty Worldskills UK, a gynhelir ar ddiwedd mis Mawrth.

Yn dilyn gyrfa llewyrchus yn niwydiant Gweinyddiaeth Bwyty, ac yn ddarlithydd yng Ngholeg Ceredigion ers nifer o flynyddoedd, mae Bill Mousley yn edrych ymlaen i’r her o feirniadu ar lefel uchaf y gystadleuaeth am y bedwaredd flwyddyn yn olynol.

Meddai Bill “Rwy’n falch iawn o dderbyn y gwahoddiad i feirniadu mewn cystadleuaeth mor uchel ei barch. Mae cystadlaethau megis WorldSkills UK yn rhoi cyfle i gystadleuwyr roi eu sgiliau ar waith, ac yn fwy na hynny, yn rhoi cyfle iddynt fwynhau’r profiad”.

Bydd rownd derfynol y gystadleuaeth WorldSkills UK yn cymryd lle yng Ngholeg Llandrillo ar y 27ain o Fawrth.

Roedd hi’n achos dathlu yng Ngholeg Ceredigion yn ddiweddar wrth i fyfyrwyr, staff, teulu a ffrindiau, ynghyd ag aelodau o Fwrdd Llywodraethu’r coleg, a Chadeirydd Cyngor Cymuned Llanbadarn ymuno i ddathlu llwyddiant myfyrwyr Coleg Ceredigion yn y Seremoni Wobrwyo flynyddol.

Eleni, cyflwynwyd 27 o wobrau gan Allison Coleman, Cadeirydd Bwrdd Llywodraethu’r coleg. Yn ystod y Seremoni, amlygodd Allison bod y gwobrau’n cael eu cyflwyno am nifer o resymau gan gynnwys cyrhaeddiad academaidd uchel, ac ymdrech arbennig ar lefel bersonol. Am y tro cyntaf eleni, cyflwynwyd Gwobr Cyfraniad Myfyriwr i un o’r myfyrwyr sydd wedi cyfranu’n helaeth i fywyd y coleg dros y flwyddyn diwethaf. 

Wrth gloi’r seremoni, estynnoddJacqui Weatherburn, Prifathrawes Coleg Ceredigion, longyfarchiadau i’r myfyrwyr ar eu llwyddiant, yn ogystal â diolch i’r  athrawon, teulu a ffrindiau am eu cymorth a’u cefnogaeth i gyrraedd eu potensial. 

Meddai Jacqui Weatherburn, “Mae’r Seremoni Wobrwyo flynyddol yn gyfle gwych i’r coleg a’r gymuned i gydnabod ac ymfalchïo yn ymdrechion a llwyddiant ein myfyrwyr. Mae’r enillwyr heno yn haeddu llongyfarchiadau gwresog, ac rydym yn dymuno pob llwyddiant iddynt yn y dyfodol”.

Ar ddiwedd y seremoni, cafwyd bwffe rhagorol wedi ei baratoi a’i weini gan fyfyrwyr a staff yr adran Arlwyo.