Mae'r cymhwyster wedi'i gynllunio'n bennaf ar gyfer dysgwyr 16-19 oed sy'n dilyn cwrs dwy flynedd. Fel arfer, bydd yn cael ei sefyll ochr yn ochr â chymwysterau lefel 3 eraill, fel cyfuniad o gymwysterau Safon Uwch a/neu gymwysterau galwedigaethol.
Gellir cwblhau cymhwyster Bagloriaeth Sgiliau Cymru Uwch yn Gymraeg neu yn Saesneg.

Mae cymhwyster Bagloriaeth Sgiliau Cymru Uwch yn cynnwys tair uned y cyfeirir atynt fel Prosiectau.

Mae’r Prosiect Cymuned Byd-eang yn cefnogi dysgwyr i ddatblygu a dangos eu bod yn gallu cymhwyso'r Sgiliau Cyfannol gan ystyried ar yr un pryd faterion byd-eang cymhleth a chymryd rhan mewn camau gweithredu cymunedol lleol (o leiaf 15 awr) i hybu dinasyddiaeth mewn byd cynaliadwy ac yng Nghymru. 

Mae’r Prosiect Cyrchfannau’r Dyfodol yn cefnogi dysgwyr i ddatblygu a dangos eu bod yn gallu cymhwyso’r Sgiliau Cyfannol gan archwilio ar yr un pryd nodau ar gyfer bywyd, cyflogadwyedd a dinasyddiaeth yn y dyfodol mewn byd cynaliadwy ac yng Nghymru.

Mae'r Prosiect Unigol yn galluogi dysgwyr i ddatblygu a dangos eu bod yn gallu cymhwyso'r Sgiliau Cyfannol gan gynllunio, rheoli a chynnal ar yr un pryd broject ymchwil annibynnol (prosiect ysgrifenedig estynedig neu arteffact).

Asesir pob Prosiect drwy gyfres o dasgau lle mae gofyn i ddysgwyr arddangos sut maen nhw'n cymhwyso eu sgiliau cynllunio a threfnu, meddwl yn feirniadol a datrys problemau, creadigrwydd ac arloesi ac effeithiolrwydd personol.  Wrth gwblhau eu hasesiadau bydd dysgwyr yn archwilio testunau sy'n berthnasol ac o ddiddordeb iddynt o fewn themâu wedi'u diffinio'n fras sy'n gysylltiedig ag Agenda Datblygiad Cynaliadwy'r Cenhedloedd Unedig a Nodau Llesiant Cymru.

 Mae asesu'r Prosiect Cymuned Byd-eang yn cyfrannu 25% at radd gyffredinol y cymhwyster.

 Mae asesu’r Prosiect Cyrchfannau’r Dyfodol yn cyfrannu 25% at radd gyffredinol y cymhwyster.

 Mae asesu'r Prosiect Unigol yn cyfrannu 50% at radd gyffredinol y cymhwyster.  Mae dysgwyr yn debygol o gwblhau'r Prosiect Unigol yn eu hail flwyddyn.

 Mae'r cymhwyster yn cael ei raddio A*-E. 

Er nad oes unrhyw ofynion mynediad ffurfiol, mae'n rhesymol tybio y bydd llawer o ddysgwyr wedi ennill cymwysterau sy'n cyfateb i lefel 2 ac y byddant wedi datblygu sgiliau cynllunio a threfnu, meddwl yn feirniadol a datrys problemau, creadigrwydd ac arloesi ac effeithiolrwydd personol i'r lefel hon. 

Mae'r cymhwyster hwn yn rhoi cyfle i fireinio a datblygu'r sgiliau hyn i lefel uwch. Nid yw'r fanyleb hon yn benodol i oedran ac felly mae'n darparu cyfleoedd i ddysgwyr barhau i ddysgu gydol oes. 

I gael rhagor o wybodaeth, ewch i wefan CBAC yn:

https://www.wjec.co.uk/home/advanced-skills-baccalaureate-wales/