Mae’r gweithdai dodrefn wedi’u cyfarparu’n llawn ag offer llaw, peiriannau gwaith coed, llwybrydd CNC, torrwr laser ac odyn solar a ddefnyddir i sychu pren yn gynaliadwy. Byddwch yn meithrin eich sgiliau ymarferol yn y gweithdy tra’n dysgu am dechnoleg pren a datblygu cynnyrch gyda’n tîm o ddarlithwyr a thechnegwyr profiadol. 

Yn ogystal rydyn ni’n rhedeg dosbarthiadau meistr gan weithwyr proffesiynol adnabyddus y diwydiant, megis clustogwyr, gwneuthurwyr cadeiriau, turnwyr pren a cherfwyr. Bob hyn a hyn rydyn ni’n hoffi mynd allan o’r gweithdy, felly bob tymor trefnir ymweliadau ag amgueddfeydd ac orielau, melinau coed a busnesau perthnasol. Hefyd mae gennym gysylltiadau gyda cholegau dramor, felly mae yna gyfle yn ogystal i gymryd rhan mewn ymweliadau cyfnewid.

I gychwyn byddwch yn dysgu sut i wneud yr uniadau sylfaen â llaw o’r rhain y gellir gwneud y rhan fwyaf o ddodrefn. Ochr yn ochr â hyn byddwch yn dysgu sgiliau gwneud dodrefn addurnol cyflenwol fel argaenwaith. Wrth symud ymlaen, byddwn yn eich dysgu sut i ddefnyddio peiriannau gwaith coed ac offer pŵer yn ddiogel yn ein gweithdy cyfarparedig llawn.

Mae prosiectau lefel dau yn cynnwys gwneud darn o argaenwaith mewn ffrâm a wnaed â llaw, bwrdd ochr a chabinet bach. Ochr yn ochr â phob prosiect ymarferol byddwch yn datblygu a chyflwyno portffolio neu lyfr braslunio o’ch gwaith datblygu dylunio a dyddlyfr gwneud technegol.

Mae dysgu am offer a thechnegau gwaith coed yn rhan annatod o wneuthur, ond mae dodrefn hefyd am ddylunio.  Rhoddir rhan sylweddol o’r cwrs i archwilio dylunio: hanesyddol a chyfoes. Byddwch yn astudio dylunwyr eiconig a gwneuthurwyr o fri, archwilio hanes dylunio a chyfuno’r ddau ddylanwad hyn gyda’ch syniadau eich hun.

Mae datblygu syniadau yn rhan allweddol o’r cwrs. Byddwn yn dysgu ystod o dechnegau braslunio a lluniadu technegol i chi er mwyn eich galluogi i archwilio a chyfathrebu eich syniadau dylunio. Yn y pen draw bydd hyn yn arwain at ddefnyddio CAD, a gellir defnyddio hwn i greu dyluniadau ar gyfer y torrwr laser a CNC.

Mae’r rhan fwyaf o ddysgwyr yn dewis parhau gyda’u hastudiaethau mewn dodrefn ar lefel tri. Efallai y byddwch am symud ymlaen i gyflogaeth mewn galwedigaethau sail coed neu ddodrefn, neu i hunangyflogaeth. Bydd y cwrs hwn hefyd yn rhoi sylfaen i chi yn egwyddorion sylfaenol dylunio, y byddwch efallai yn dewis gwneud defnydd o hyn wrth fynd ymlaen i bwnc creadigol ar lefel addysg uwch.

Mae gwaith cwrs ymarferol a damcaniaethol yn ffurfio’r sail ar gyfer asesu. Does dim arholiadau ffurfiol. Bydd beirniadaethau grŵp rheolaidd ac asesiadau interim yn darparu adborth i chi a fydd yn eich galluogi i ddatblygu eich sgiliau.

4 TGAU graddau A* - D gyda 2 radd C, un naill ai’n Saesneg/Cymraeg (iaith gyntaf) neu fathemateg. Neu wedi cwblhau cymhwyster galwedigaethol lefel un yn llwyddiannus mewn pwnc perthnasol. Mae yna groeso i fyfyrwyr hŷn heb gymwysterau a gellir eu derbyn yn amodol ar gyfweliad llwyddiannus. Gofynnwn fod gennych chi ddiddordeb gwirioneddol yn y pwnc. Mae ymrwymiad a brwdfrydedd yn hanfodol er mwyn cael y budd mwyaf o'r cwrs.

Mae ffi gweithdy o £50 yn cwmpasu deunyddiau ar gyfer y prosiectau craidd. Caiff deunyddiau prosiect ychwanegol eu costio ar sail unigol.

Mae’n ofynnol i bob dysgwr dalu ffi gweinyddu o £25.00 wrth gofrestru. 

Bydd angen i chi ddarparu eich esgidiau diogelwch eich hun (blaenau troed amddiffynnol), tâp mesur a deunydd ysgrifennu. Darperir yr holl offer eraill. Gall rhai teithiau arbenigol olygu costau ychwanegol.