Cyflwynir y cwrs yn bennaf yn yr ystafell ddosbarth; fodd bynnag, bydd gofyn i chi ymgymryd â 100 awr o ymgysylltu â’r sector, gan gynnwys lleoliad gwaith, ymweliadau â’r gweithle, darlithoedd gwadd a mynychu cynadleddau a digwyddiadau allanol. Bydd yr ymgysylltiad hwn â’r sector yn rhoi profiad i chi yn y sector iechyd neu ofal cymdeithasol, wedi’i deilwra ar gyfer eich dyheadau gyrfa yn y dyfodol.

Mae gan bob aelod o staff sy'n cyflwyno'r cwrs hwn brofiad helaeth o weithio yn y sector Iechyd a Gofal Cymdeithasol neu Wyddor Iechyd; felly, mae nifer o gysylltiadau lleol a chenedlaethol wedi'u meithrin i gynnig cyfleoedd ychwanegol i bob dysgwr.

Bydd y cymhwyster hwn yn eich galluogi i ddatblygu ac arddangos gwybodaeth, sgiliau a dealltwriaeth o fewn cyd-destun gwasanaethau iechyd a gofal cymdeithasol, gan gynnwys:

• Egwyddorion gofal ac ymarfer diogel
• Ffactorau sy’n effeithio ar dwf a datblygiad unigolion
• Hawliau unigolion
• Cefnogi unigolion sydd mewn perygl
• Gweithio yn y sector iechyd a gofal cymdeithasol
• Iechyd a chlefyd dynol
• Dulliau ymchwilio gwyddoniaeth feddygol
• Meddyginiaethau a thrin clefydau
• Technegau labordai clinigol

Mae’r cymhwyster hwn yn darparu gwybodaeth, sgiliau a dealltwriaeth greiddiol, ac ystod o opsiynau i adlewyrchu ehangder gyrfaoedd yn y sector Iechyd a/neu Ofal Cymdeithasol.

Mae’r cwrs hwn yn cynnig cyfoeth o gyfleoedd i’r rhai sy’n chwilio am yrfa fel Nyrsio, Gofal Cymdeithasol, Bydwreigiaeth, Radiograffeg, Gwyddorau Biofeddygol, Gwaith Cymdeithasol, Seicoleg, y Gyfraith, Troseddeg, Ecoleg a llawer o yrfaoedd eraill.

Yn ddiweddar mae ein myfyrwyr wedi mynd ymlaen i astudio a chymhwyso, er enghraifft, fel Nyrsys, Radiograffwyr, Ffisiolegwyr, Gwyddonwyr Ymchwil, Athrawon, Gweithwyr Cymdeithasol, a Rheolwyr Gofal Iechyd neu wedi mynd ymlaen i weithio fel gweithwyr cymorth gofal iechyd neu weithio ym maes gofal cymdeithasol.

Asesir unedau trwy gyfuniad o asesu mewnol ac asesiadau allanol. Gall asesiadau fod ar ffurf traethodau, adroddiadau, cyflwyniadau, trafodaethau, arholiadau ac ati.

Bydd angen geirda cadarnhaol ar bob ymgeisydd. Bydd addasrwydd ar gyfer y cwrs hwn yn cael ei asesu mewn cyfweliad.

TGAU: O leiaf 5 TGAU graddau A* - C, gan gynnwys Saesneg iaith neu Gymraeg iaith gyntaf. Mae angen i Fathemateg fod yn radd E neu uwch.

Bydd gan ddysgwyr sy'n symud ymlaen o gwrs L2 yng Ngholeg Ceredigion ofynion mynediad gwahanol, gan gynnwys cwblhau ac ymgysylltu'n llwyddiannus â'r rhaglen astudio gyfredol, datblygiad sgiliau profedig, lefelau presenoldeb da a derbyn geirda cadarnhaol.